કેન્દ્ર સરકારે Operation Sindoor અને સરહદ પારના આતંકવાદ સામે ભારતના વલણને સમજાવવા માટે સર્વપક્ષીય સાંસદોના 7 પ્રતિનિધિમંડળની રચના કરી છે. આ પ્રતિનિધિમંડળ વિશ્વના મુખ્ય દેશોની, ખાસ કરીને સંયુક્ત રાષ્ટ્ર સુરક્ષા પરિષદ (UNSC) ના સભ્ય દેશોની મુલાકાત લેશે.
સંસદીય બાબતોના મંત્રાલયે શનિવારે પ્રતિનિધિમંડળનું નેતૃત્વ કરી રહેલા સાંસદોના નામ જાહેર કર્યા. આમાં Congress ના એકમાત્ર સાંસદ Shashi Tharoor નું નામ પણ શામેલ છે. હવે કોંગ્રેસે કહ્યું છે કે તેણે થરૂરનું નામ કેન્દ્રને આપ્યું ન હતું.
કોંગ્રેસના નેતા Jairam Ramesh એ X પર લખ્યું, ‘શુક્રવાર (16 મે) સવારે સંસદીય બાબતોના મંત્રી કિરેન રિજિજુએ કોંગ્રેસ અધ્યક્ષ મલ્લિકાર્જુન ખડગે અને વિપક્ષના નેતા રાહુલ ગાંધી સાથે વાત કરી.’ તેમણે વિદેશ મોકલવા માટેના પ્રતિનિધિમંડળ માટે 4 સાંસદોના નામ માંગ્યા હતા. કોંગ્રેસે આનંદ શર્મા, Gaurav Gogoi, ડૉ. સૈયદ નસીર હુસૈન અને રાજા બ્રારના નામ આપ્યા હતા.
બીજી તરફ, શશિ થરૂરે પ્રતિનિધિમંડળનું નેતૃત્વ કરવાની જવાબદારી આપવા બદલ કેન્દ્રનો આભાર વ્યક્ત કર્યો. તેમણે X પર લખ્યું, ‘તાજેતરના વિકાસ પર આપણા દેશના દ્રષ્ટિકોણને રજૂ કરવા માટે પાંચ મુખ્ય દેશોની રાજધાનીઓમાં સર્વપક્ષીય પ્રતિનિધિમંડળનું નેતૃત્વ કરવા માટે ભારત સરકારના આમંત્રણથી હું સન્માનિત છું.
આ પણ વાંચો – PM Modi એ યુદ્ધવિરામના 51 કલાક બાદ રાષ્ટ્રને કર્યું સંબોધિત
સંસદીય બાબતોના મંત્રાલય દ્વારા જાહેર કરાયેલા પ્રતિનિધિમંડળનું નેતૃત્વ કરી રહેલા 7 સાંસદોના નામોમાં શશિ થરૂરની સાથે ભાજપ તરફથી રવિશંકર પ્રસાદ અને બૈજયંત પાંડા, JDU તરફથી સંજય કુમાર ઝા, DMK તરફથી કનિમોઝી કરુણાનિધિ, NCP (SP) તરફથી Supriya Sule અને શિવસેના (શિંદે જૂથ) તરફથી Shrikant Eknath Shinde નો સમાવેશ થાય છે.
તમામ સાત પ્રતિનિધિમંડળ 23 અથવા 24 મેના રોજ ભારતથી રવાના થશે. આગામી 10 દિવસ સુધી, તેઓ વિશ્વના મુખ્ય દેશોની મુલાકાત લેશે, ખાસ કરીને સંયુક્ત રાષ્ટ્ર સુરક્ષા પરિષદ (UNSC) ના સભ્ય દેશોની. ત્યાં તેઓ સમજાવશે કે આતંકવાદ સામે ભારતનો શું દૃષ્ટિકોણ છે અને ઓપરેશન સિંદૂર હેઠળ પાકિસ્તાન સામે શા માટે અને કેવી રીતે કાર્યવાહી કરવામાં આવી છે.
