Union Budget 2024 23 જુલાઈએ રજૂ કરવામાં આવશે. તેની તૈયારીઓ પૂર્ણ થઈ ગઈ છે. બજેટ સંબંધિત દસ્તાવેજોની પ્રિન્ટિંગની શરૂઆત સાથે, આજે સાંજે પરંપરાગત Halwa Ceremony નું આયોજન કરવામાં આવ્યું હતું. આ ઘટના દિલ્હીના નોર્થ બ્લોક સ્થિત કેન્દ્રીય નાણા મંત્રાલયમાં બની હતી.
Union Budget 2024 રજૂ થાય તે પહેલા આ ઘટનાનો વીડિયો સોશિયલ મીડિયા પ્લેટફોર્મ X પર શેર કરવામાં આવ્યો છે. જેમાં નાણામંત્રી નિર્મલા સીતારમણ લોખંડની મોટી કડાઈમાં રાખેલા હલવા સાથે જોવા મળે છે. નાણામંત્રીએ મંત્રાલયના અધિકારીઓને હલવો પીરસ્યો હતો. આ પ્રસંગે કેન્દ્રીય નાણા રાજ્ય મંત્રી ડો.ભગવત કિશનરાવ કરાડ, પંકજ ચૌધરી અને નાણા મંત્રાલયના વરિષ્ઠ અધિકારીઓ ઉપસ્થિત રહ્યા હતા.
નાણામંત્રી નિર્મલા સીતારમણ સતત સાતમી વખત બજેટ રજૂ કરશે. આમ કરનાર તે દેશના પ્રથમ નાણામંત્રી બનશે. આ પહેલા મોરારજી દેસાઈએ સતત 6 બજેટ રજૂ કર્યા હતા. આ બજેટ નવી સરકારનું પ્રથમ પૂર્ણ બજેટ હશે. સરકારે ફેબ્રુઆરીમાં વચગાળાનું બજેટ રજૂ કર્યું હતું. બજેટ સત્ર 22 જુલાઈથી 12 ઓગસ્ટ સુધી ચાલશે.
બજેટ ફાઇનલ થતા પહેલા નાણા મંત્રાલયમાં હલવો બનાવવામાં આવે છે. આ વિધિ લાંબા સમયથી ચાલી રહી છે. મીઠાઈથી શુભ કાર્યની શરૂઆત કરવી એ Halwa Ceremony ની ઉજવણીનું મુખ્ય કારણ છે. આ ધાર્મિક વિધિ 2021 અને 2022 માં COVID-19 રોગચાળાને કારણે કરવામાં આવી ન હતી. તેના બદલે, મુખ્ય કર્મચારીઓને કોવિડ પ્રોટોકોલને અનુસરીને મીઠાઈ આપવામાં આવી હતી.
આ પણ વાંચો: Budget 2024: નિર્મલા સીતારમણ સતત 7મી વખત રજૂ કરશે બજેટ
હલવા સમારોહ પછી, બજેટ છાપવાની પ્રક્રિયા શરૂ થાય છે. તેની રજૂઆત સુધી, પ્રિન્ટિંગ સાથે સંકળાયેલા તમામ અધિકારીઓ અને સહાયક સ્ટાફ મંત્રાલયમાં બંધ છે. આ સમયગાળા દરમિયાન, અધિકારીઓને તેમના ફોનનો ઉપયોગ કરવાની મંજૂરી નથી. જ્યાં સુધી બજેટ રજૂ ન થાય ત્યાં સુધી તેઓ તેમના પરિવારને પણ મળી શકતા નથી. તેનો હેતુ બજેટને ગોપનીય રાખવાનો છે. 1950માં બજેટની કોપી લીક થયા બાદ કર્મચારીઓને નજરકેદ રાખવાની પરંપરા શરૂ થઈ હતી.
