Gautam Gambhir ટીમ ઈન્ડિયાનો મુખ્ય કોચ બની ગયો છે. બીસીસીઆઈના સચિવ જય શાહે મંગળવારે આની જાહેરાત કરી હતી. 42 વર્ષના ગંભીરે ધ વોલ તરીકે જાણીતા રાહુલ દ્રવિડનું સ્થાન લીધું છે. T20 વર્લ્ડ કપ બાદ દ્રવિડનો કાર્યકાળ ખતમ થઈ ગયો. ગંભીરનો કાર્યકાળ જુલાઈ 2027 સુધી ચાલશે. Gautam Gambhir એ દોઢ મહિના પહેલા કોલકાતા નાઈટ રાઈડર્સને આઈપીએલ-2024માં ચેમ્પિયન બનાવ્યું હતું. તે આ વર્ષે કોલકાતા ફ્રેન્ચાઈઝીનો માર્ગદર્શક બન્યો હતો. આટલું જ નહીં, તેની મેન્ટરશિપ હેઠળ ગંભીર લખનૌ સુપર જાયન્ટ્સને સતત બે સિઝનમાં પ્લેઓફમાં લઈ ગયો હતો.
જય શાહે સોશિયલ મીડિયા X પર કર્યું પોસ્ટ
BCCI સચિવ જય શાહે પોસ્ટમાં લખ્યું છે- “આધુનિક ક્રિકેટ ઝડપથી વિકસિત થયું છે અને ગંભીરે તેને ખૂબ નજીકથી જોયું છે. ગૌતમે તેની કારકિર્દીમાં ઘણી મુશ્કેલીઓ દૂર કરી છે. તેણે વિવિધ ભૂમિકાઓ ભજવી છે. મને વિશ્વાસ છે કે તે ભારતીય ક્રિકેટને આગળ લઈ જવા માટે આદર્શ વ્યક્તિ છે. તેની સ્પષ્ટ દ્રષ્ટિ અને અનુભવ તેને ભારતીય ટીમના કોચિંગની ભૂમિકા નિભાવવામાં સક્ષમ બનાવે છે.”
ગૌતમ ગંભીરે સોશિયલ મીડિયા પોસ્ટમાં લખ્યું – ‘ભારત મારી ઓળખ છે અને દેશની સેવા કરવી મારા માટે ગર્વની વાત છે. ટીમ ઈન્ડિયામાં પાછી ફરીને મને ગર્વની લાગણી થાય છે, જોકે કેપ અલગ-અલગ હશે, પરંતુ મારો ધ્યેય એ જ રહેશે જે હંમેશા રહ્યો છે… દરેક ભારતીયને ગૌરવ અપાવવાનો. 140 કરોડ ભારતીયોના સપના મેન ઇન બ્લુના ખભા પર છે અને હું તેને સાકાર કરવા માટે તમામ શક્ય પ્રયાસો કરીશ.
રાહુલ દ્રવિડને નવેમ્બર 2021માં ભારતનો મુખ્ય કોચ બનાવવામાં આવ્યો હતો, જ્યારે ટીમ ઈન્ડિયા T20 વર્લ્ડ કપના ગ્રુપ સ્ટેજમાંથી બહાર થઈ ગઈ હતી. ટીમે 2022 T-20 વર્લ્ડ કપમાં ફરીથી સેમિફાઇનલ રમી હતી. 2023માં ODI વર્લ્ડ કપ બાદ દ્રવિડનો કાર્યકાળ સમાપ્ત થઈ ગયો હતો, પરંતુ ટીમ ઈન્ડિયા ફાઇનલમાં પહોંચવાને કારણે તેનો કાર્યકાળ T20 વર્લ્ડ કપ સુધી લંબાવવામાં આવ્યો હતો. ત્યારબાદ દ્રવિડે ભારતને T-20માં વર્લ્ડ ચેમ્પિયન બનાવ્યું હતું. 29 જૂને ભારતે દક્ષિણ આફ્રિકાને 7 રને હરાવીને T-20 વર્લ્ડ કપ જીત્યો હતો. દ્રવિડના કોચિંગ હેઠળ ટીમ ઈન્ડિયાએ 2023માં એશિયા કપ પણ જીત્યો છે. ભારતે યજમાન શ્રીલંકાને હરાવીને ટાઈટલ જીત્યું હતું.
આ પણ વાંચો: BCCI: 15 ખેલાડીઓને 5 કરોડ રૂપિયા મળશે
